Ellah çi zatek ehsen e

Ellah çi zatek ehsen e
Zêde Letîf û Qadirî

Mexlûq hemî nexşê Te ne
Vêk ra li hemyan fekirî

Hemd û sena laiq we ne
Yê ‘erşê ‘ezîm çêkirî

‘Erşê ‘ezîmê ekber e
Zînet û raza merkezî

Ew kursiya heq li ser e
Bê şems û gerdûn dibezî

Heq Wahîd e Witr e Fer e
Bê newm e baxvanê rezî

Baxê ku baxvan bête ber
Erdek heye Ew lê nebî

Dara ku enqa bête ser
Belgek heye sih lê nebî

Kî ji nî’metê dê dit xeber
Ya Reb derê feyzê vebî

Ser çeşmeya feyzê çi ye?
Hate lîsanê ‘arifan

Ew nûreka esmanî ye
Darête qelbê xaîfan

Ji şem’eyek da Meksî ye
Lew bû nedîmê taifan

Lew bûn herîf lew bûm nedim
Min ‘işqeka dijwar heye

Kovî kirim serfa ‘ezîm
Min hêj meya pêrar heye

Minet ji Rehmanê Rehîm
Min mîrekî Sitar heye

Ew mîr Kerîm e Satir e
Xweş Hakim e di barê xwe da

Xelqno! ne dûr e hazir e
Ew Wahid e û bê îbtîda

Her çî bikit ew Qadir e
Ew Xalikê bê bab û da

Xelqno! ji kê ra ev qese
Daheq bi ‘urfê nas nasbikî

Er dê bizanî ev bes e
Ferxunde ye ne j’ferxekî

Ew yek ji ‘amê re bes e
Neh çerx di nava çerxekî

Çerxê di nêv çerxa ez im
Ruh û rewana min Tu yî

Ez hişkedarim narizim
Xeml û ruhana min tu yî

Bê Te neşêm gavek bezim
Xanim mirada min tu yî

Bê Te miradek meyt im
Qelbim ji sûr mîrate ye

Ez geştîyê natebitim
Fexra qulûban Te heye

Xelqno! bi Fûrqan û xetim
Herçî dibêjim her we ye

Ma ez dibêm vê gotinê
Bêy Te ziban bê gotin e

Ew qal û qîl e di dinê
Zahir û batin sakin e

Bûn mîqata mirinê
Ew ji bal Te ne ne ji bal mine

Min hewl nehin quwet nehin
Ruh ji Te ye dîn ji Te ye

Min zehr û ezman navebin
Deng ji Te ye sewt ji Te ye

Awaz ji kewna qudret in
Dest ji Te ye çeng ji Te ye

Ew çeng çi ye roja ewel
Çeng û lîsan jî digirî

Deng têt ji sazê pir’emel
Tembûr tiraş û kun kirî

‘Işq û evîndarê Te dil
Hubba di nîvê çêkirî

Hub rêtî canê beşere
Sewda ji mejyê wî firî

Goyinî nêv dar û ber e
Bê sûc e qet nakit girî

‘Işq û evîna qemer e
Netq û lîsanê jê birî

Deng ji defa canê me tê
Kirdin nefir û nayekî

Sani’ bi herfê pif ketê
Her zehrekî b’awazekî

Subhan ji Şahê Qudretê
Her canekî û ebdanekî
.............................................
Ta’et bike rê dûr î tu
Herçî di mektûba me de

B’kaxez û kîs û mor î tu
Ya min bida fî min bida

Canê di kûba sor î tu
Rohnîya sem’ û beser da

Canê di navê nefsî ye
Vêk ra hemî bû beşerî

Maka wicûdan fanî ye
Ew dê bizanî vî derî

Eslê ruha me baqî ye
Lew jê nedakin xawerî

Dê biçîne nîva axekê
Perda turabê tarîye

Feqî dê rakit rahekê
Bi mehdera wî barî ye

Bo çak û parisa bi carekê
Li cinnet bikin serdariyê

Avek mehîn im kemter im
Min cerg û dil bûne birîn

Sewda û dîn û ebter im
Pabendê vê nefsa le’în

Muksîyê jar û bedtir im
Ferhemnî xeyre-Rahimîn

Eklenme: 21-07-2007
Şair: Feqiyê Teyran
Gönderen Uye: HakaN
Hit: 2
[ Geri dön | Yorum Ekle | Sevdiklerinize gönderin | Yazdırın ]